События

Нясвіжскае праваслаўнае брацтва склікае неабыякавых людзей

Упершыню ў гісторыі Нясвіжчыны ў гэтым рэгіёне створана праваслаўнае брацтва.

Брацтва названа ў гонар Праабражэння Гасподняга. Кіруе суполкай настаяцель храма Святой Тройцы аграгарадка Салтанаўшчына протаіерэй Алег Абрамовіч.

У будынку па нясвіжскай вуліцы Гейсіка, які адданы Брацтву на рэканструкцыю пад будучы праваслаўны маладзёжны цэнтр, кожны панядзелак у 17:30 адбываюцца малебны. У тым жа будынку праводзяцца дабрачынныя кірмашы рэчаў. Маламаёмныя людзі (пенсіянеры, інваліды, малазабяспечаныя сем’і, адзінокія і шматдзетныя), ўсе, хто мае патрэбу, могуць выбраць для сябе адзенне, абутак і т.п. Брацтва дапамагае ўсім незалежна ад веравызнання.

Дзейнасць Брацтва набірае сілу. Суполка займаецца таксама валанцёрскай працай і заклікае ўсіх жадаючых паспрабаваць сябе ў гэтай якасці. У рамках дзейнасці Брацтва існуе служба псіхалагічнай дапамогі. На сустрэчы, арганізаваныя Брацтвам, запрашаюцца цікавыя асобы.

Брацтва запрашае ўсіх неабыякавых людзей паўдзельнічаць у дабрачынных акцыях, ахвяраваць дарослае і дзіцячае адзенне і абутак, тыя рэчы, якія пыляцца ў шафах, а маглі б прынесці радасць людзям, якія маюць у іх патрэбу. Камусьці маламаёмнаму будзе дарэчы і не патрэбная вам бытавая тэхніка, старая мэбля, посуд — нават у адзінкавым экзэмпляры. Таксама на патрэбы Брацтва можна аддаць макулатуру і металалом. Калі ў вас ёсць рэчы, якія вы хацелі б ахвяраваць, але няма магчымасці іх даставіць, братчыкі забяруць іх на сваім транспарце. Даведкі наконт ахвяравання — па тэлефонах 5-10-89 і 8-029-168-99-51.

Кожны хрысціянін закліканы рабіць дабро. Маленькая крупінка дабра здольная стварыць цуд. Для кагосьці цуд — выцягнуць шчаслівы латарэйны білет, а для кагосьці стане цудам ваша дапамога. А дабро вернецца адтуль, адкуль вы і не чакалі. І вы адчуеце сябе шчаслівым, ашчаслівіўшы іншага, — упэўнены братчыкі.

Па ўсіх пытаннях, звязаных з дзейнасцю Брацтва, даведкі па тэлефоне 8-029-315-44-23.

Аксана Шкрэд,

член Брацтва Праабражэння Гасподняга